असार ९ अछाम ः पञ्चदेवल विनायक नगरपालिका ६ तोलीकी एक किशोरीले बालविवाह गरेकी छन् । छाउ भएका बेला छाउगोठमा बस्दै आएकी १५ वर्षकी किशारीले बालविवाह गरेको हुन् । शुक्रवार राति छाउ भएका बेला गोठबाटै भागेर बालविवाह गरेको वडा अध्यक्ष कमल रावलले बताए । वालविवाह गरेको खबर पाउना साथ प्रहरीलाई खबर गरेको उनले बताए । अहिले प्रहरीले दुबैलाई पक्राउ गरेको वडा अध्यक्ष रावलले बताए । उनले भने, ‘छाउगोठले धेरै कुरामा असर पारेको छ । ति किशोरीले छाउगोठबाटै कमलबजार नगरपालिका– ६ वीरपथ बिहे गरेर गएको रहेछिन् । छाउगोठले धेरै समस्या निम्त्याएको छ। कुप्रथाका र वालविवाह विरुद्ध जनचेतनामूलक कार्यक्रमहरू निरन्तर चलिरहनुपर्छ।’ वडामा गोठ भत्काउने अभियान सञ्चालन गरेको वडाध्यक्ष कमल रावलले जानकारी दिए । वडामा करिब २५÷३० छाउगोठ रहेको अनुमान गरिएको र शुक्रबार मात्र १६ वटा छाउगोठ भत्काएको रावलले बताए । पञ्चदेवल विनायक नगरपालिकाकी एक १६ वर्षीया किशोरी मामा नाता पर्नेबाट छाउगोठमै बलात्कृत भइन्। असार ३ गते भएको उक्त घटनापछि जिल्लामा छाउगोठ भत्काउने अभियान पुनः सुरु भएको छ। किशोरी बलात्कार भएको घटना सार्वजनिक भएकै दिन भत्काइएको छ। पाँच वर्ष भत्काइएको छाउगोठ फेरि बनेका छन्। घरै बस्न थालेका किशोरी तथा महिलाहरूले फेरि छाउगोठमै फर्कन थालेका छन्।